काठमाडौँ :- आगामी प्रतिनिधिसभा सदस्य निर्वाचनको सुरक्षालाई लक्षित गर्दै नेपाल प्रहरीले ठूलो सङ्ख्यामा निर्वाचन प्रहरी भर्ना खुला गरेको छ। मानवस्रोत विकास विभाग (भर्ना छनोट शाखा) का अनुसार कुल १ लाख ३३ हजार ९८० जना निर्वाचन प्रहरी माग गरिएको हो।
निर्वाचन प्रहरीका लागि यही पुस २५ गतेदेखि आगामी माघ १ गतेसम्म देशभरका ७७ वटै जिल्ला प्रहरी कार्यालयमा दरखास्त दिन सकिनेछ। दरखास्त दिने उम्मेदवारले आवेदन दर्ता गर्ने अन्तिम मितिसम्म १८ वर्ष पूरा भई ५४ वर्ष ननाघेको हुनुपर्ने प्रहरी प्रधान कार्यालयले जनाएको छ।
केन्द्रीय प्रहरी प्रवक्ता एवं प्रहरी नायब महानिरीक्षक अबिनारायण काफ्लेका अनुसार नेपाली नागरिक, साधारण लेखपढ गर्न जान्ने, नैतिक पतन देखिने कुनै फौजदारी अभियोगमा अदालतबाट सजाय नपाएको, कुनै राजनीतिक दलको सदस्य नभएको तथा शारीरिक र मानसिक रूपमा स्वस्थ व्यक्ति निर्वाचन प्रहरीमा आवेदन दिन योग्य हुनेछन्। साथै आतङ्ककारी वा विध्वंसात्मक सङ्गठनसँग आबद्ध नभएको हुनुपर्ने सर्त पनि राखिएको छ।
प्रहरीका अनुसार नेपाली सेना, नेपाल प्रहरी र सशस्त्र प्रहरी बल नेपालबाट सेवा निवृत्त पूर्वसुरक्षाकर्मी, पूर्ववन रक्षक, साथै हालै विभिन्न सुरक्षा निकायमा भर्नाका लागि आवेदन दिई शारीरिक तन्दुरुस्ती तथा स्वास्थ्य परीक्षण उत्तीर्ण गरेका व्यक्तिलाई निर्वाचन प्रहरीका रूपमा छनोट गरिनेछ। यसअघि सम्पन्न प्रतिनिधिसभा, प्रदेशसभा तथा स्थानीय तह निर्वाचनमा म्यादी प्रहरीका रूपमा सन्तोषजनक सेवा दिएका व्यक्ति र विदेशी मित्रराष्ट्रका सुरक्षा निकायमा कार्य गरी सेवा निवृत्त भएका नेपाली नागरिक पनि छनोटको प्राथमिकतामा रहने जनाइएको छ।
आवेदकमध्ये प्रारम्भिक छनोट आगामी माघ ५ देखि ९ गतेसम्म गरिनेछ भने अन्तिम नतिजा माघ १२ गते सार्वजनिक गरिने कार्यतालिका छ। छनोट भएका निर्वाचन प्रहरीलाई माघ १५ देखि २४ गतेसम्म तालिम तथा प्रशिक्षण दिइनेछ। निर्वाचन प्रहरीको कार्यअवधि नियुक्ति मितिले ४० दिन वा नेपाल सरकारले तोकेबमोजिम हुने जनाइएको छ।
तपाईको प्रतिक्रिया
सम्बन्धित खवर
